Tungo sa ika-25 anibersaryo ng Mabuhay
NAGSIMULA noong buwan ng Enero ang ika-25 taon ng aming pamamahayag. Sa nakalipas na 24 na taon ay maraming pagsubok at hirap ang aming hinarap at dinaanan, at nagtamo rin kami ng mga tagumpay na ang pinakamatamis ay ang karanasang makapaglingkod sa aming abot kaya sa mambabasa at sa sambayanang aming sinumpaang pagsisilbihan.
Salamat. Maraming salamat sa lahat.
Unang-una na sa Panginoon; pangalawa, sa aming mambabasa at tagapagtaguyod.
Parang kahapon lamang, ika nga. Subalit, kung tutuusin, mahaba’t tunay na naging makasaysayan ang 24 na taong nalagas sa tangkay ng panahon mula noong isinilang ang Mabuhay.
Ang kaunaunahang sipi ng aming lingguhang pahayagan ay inilathala noong ika-20 ng Enero 1980. Buhat noon hanggang ngayon, tuloy-tuloy ang paglabas ng Mabuhay — sa awa ng Maykapal, sa pagsisikap ng patnugutan, palimbagan, tauhan sa pagkalap ng anunsiyo at pagpapakalat, iba pang mga kasamahan na ang ilan ay sumakabilang buhay na, ilang piling kaibigan tulad ni Ka Doroy Valencia na sumagip sa amin sa oras ng kagipitan, mga mahal sa buhay at kapamilya, at siempre sa pagtangkilik ng mambabasa.
Muli, maraming salamat po sa inyong lahat!
Sa pagtahak namin sa ika-25 taon ng aming pamamahayag ngayong taong 2004, hayaan ninyong ulitin namin ang aming sinabi sa araw ng aming pagsilang noon 1980.
“Ang simulain naming ito ay batay sa paniniwalang ang Mabuhay ay bahagi ng sambayanan. Kaya sa inyong tulong ... ang tagumpay ng Mabuhay ay tagumpay ng mamamayan at ng bayan.
“Kasama sa adhikaing ito ang nasang magsasagawa ng maraming pagbaabgo sa ... pamamahayag ... (upang ito ay) maging makatarungan at kapakipakinabang sa mamamayan at bayan ...
“Sa pamamagitan ng unang bilang ng Mabuhay, hayaan ninyong ilahad namin sa inyo ang aming puso at iabot namin ang aming kamay, kung kami nga’y magiging karapat-dapat.”
Ang pagsapit ng bagong taon ay hudya’t din ng pagsisimula ng panibagong taon sa aming pamamahayag. Kaya nang ipagdiwang ng Mabuhay ang ika-24 na kaarawan nito noong Enero 20, 2004, nagsimula na rin ang ika 25-taong ng paglalathala ng Mabuhay. At kung ipahihintulot ng Maykapal at sa tulong na rin ng mga mambabasa at mga tagapagtaguyod, kami ay umaasang mararating at aming maidaraos sa pamamagitan ng isang angkop na siping pang ika-25 taon o pinilakang anibersaryo sa darating na Enero 20, 2005.
At sa tulong ng lahat ng tumatangkilik sa Mabuhay at sa kahalagahan ng malayang pamamahayag, umaasa kami na maidaraos namin ang isang pagdiriwang na angkop sa kaarawan ng isang lingguhang peryodiko na nakabuo ng 25 taong paglilingkod sa mambabasa, sambayanan at Maykapal.
Maraming salamat muli.
Mabuhay po kayo at nawa’y maging mapayapa at masagana ang taong 2004.